കളിയെഴുത്ത് മലയാള പത്രപ്രവര്‍ത്തനത്തിലെ ഒരു പ്രത്യേക ശാഖയാക്കി വികസിക്കുന്നതും കളിയോളം തന്നെ ആസ്വാദ്യമായ ഒരു മേഖലയായി അസ്തിത്വം നേടുന്നതും വിംസി എന്ന വി.എം.ബാലചന്ദ്രനിലൂടെയാണ്. ബ്രാഡ് മാന്റെയും പെലെയുടേയും മുഹമ്മദലിയുടേയും കാലവും പി.ടി.ഉഷയുടേയും സച്ചിന്‍ ടെണ്ടുല്‍ക്കറുടെയും കാള്‍ ലൂയിസിന്റെയും കാലവും ഒരു പോലെ മലയാളി അറിഞ്ഞതും, അനുഭവിച്ചതും, രേഖപ്പെടുത്തി വെച്ചതും വിംസി എന്ന സ്പോര്‍ട്സ് ലേഖകനിലൂടെയാണ്. മാതൃഭൂമി ദിനപത്രത്തില്‍ ന്യൂസ് എഡിറ്ററായും അസിസ്റ്റന്റ് എഡിറ്ററായും പ്രവര്‍ത്തിച്ചു പിരിഞ്ഞ വിംസി വിരമിച്ച ശേഷവും രണ്ടു പതിറ്റാണ്ടായി കേരളത്തിലെ എല്ലാ പ്രമുഖ പത്രങ്ങളിലും കളിയെക്കുറിച്ച് എഴുതിയിരുന്നു. മലയാള സ്പോര്‍ട്സ് വായനക്കാര്‍ വിം.സി എന്ന വാക്ക് കലര്‍പ്പില്ലാത്ത കായികം എന്ന അര്‍ത്ഥത്തിലാണ് മനസ്സിലാക്കുന്നത്. കാണികളിലൊരാളായി അവരുടെ പക്ഷത്തു നിന്നുകൊണ്ട് നല്ല കളികള്‍ കാണാനുള്ള അവരുടെ അവകാശങ്ങള്‍ക്ക് വേണ്ടി നിരന്തരം തൂലിക ചലിപ്പിച്ചയാളാണ് വിം.സി. കളിവിരുദ്ധമായ എന്തിനെയും എതിര്‍ത്ത വിംസി ഗൌരവമേറിയ ഒരു സ്പോര്‍ട്സ് വായനക്ക് കേരളത്തില്‍ കളമൊരുക്കി. കളിക്കളത്തിലെ തെറ്റായ പ്രവണതയെ വിംസി രൂക്ഷമായ ഭാഷയിലാണ് വിമര്‍ശിക്കാറ്. ഒട്ടേറെ വലിയ കളിക്കാര്‍ വരെ മുഖം നോക്കാതെയുള്ള വിംസിയുടെ രൂക്ഷ വിമര്‍ശനങ്ങള്‍ക്ക് പാത്രമായിരുന്നു. ഇത്തരത്തിലുള്ള വിമര്‍ശനങ്ങള്‍ തന്റെ കായികക്കുതിപ്പിന് ഏറെ പ്രയോജനം ചെയ്തിട്ടുണ്ടെന്നാണ് പി.ടി.ഉഷ പറഞ്ഞത്. കേരളത്തിലെ കായികമേഖലക്ക് വിംസി ചെയ്ത സംഭാവന ചരിത്രത്തില്‍ രേഖപ്പെടുത്തേണ്ടതാണ്.

കോഴിക്കോട് ജില്ലയിലെ താമരശ്ശേരിയില്‍ വിളയാട്ടുശ്ശേരി മുള്ളമ്പത്ത് തറവാട്ടില്‍ 1925 നവമ്പര്‍ 25-നാണ് വിംസി എന്ന വി.എം.ബാലചന്ദ്രന്‍ ജനിച്ചത്. പാലക്കാട് വിക്ടോറിയ കോളേജില്‍ ഇന്റര്‍മീഡിയറ്റിനു പഠിക്കുമ്പോള്‍ അസുഖം മൂലം പഠനം നിറുത്തേണ്ടിവന്ന ബാലചന്ദ്രന്‍ 1949-ല്‍ കോഴിക്കട്ടു നിന്നിറങ്ങുന്ന 'ദിനപ്രഭ' എന്ന പത്രത്തിലൂടെയാണ് പത്രപ്രവര്‍ത്തന രംഗത്തെത്തുന്നത്. 1950-ല്‍ മാതൃഭൂമിയില്‍ സബ്ബ് എഡിറ്റര്‍ ആയ വിംസി 1985 നവംമ്പര്‍ 25-ന് അസിസ്റന്റ് എഡിറ്ററായാണ് വിരമിക്കുന്നത്. പിന്നീട് അഞ്ചുവര്‍ഷം കാലിക്കറ്റ് ടൈസില്‍ അസോസിയെറ്റ് എഡിറ്ററായി ജോലി നോക്കി. വിരമിച്ച ശേഷവും കഴിഞ്ഞ രണ്ടു പതിറ്റാണ്ടായി കേരളത്തിലെ എല്ലാ പ്രമുഖ പത്രങ്ങളിലും കളിയെക്കുറിച്ച് വിംസി എഴുതിയിരുന്നു. 

 ചിത്രങ്ങള്‍: പുനലൂര്‍ രാജന്‍